gernikako kultura eta bakearen XVII: jardunaldiak
Aurkezpena

“Gernika, Guernica eta bestelako Gernikak. Bakearen sinbologia.”

Gernika Gogoratuzek antolatutako Gernikako Kultura eta Bakearen Nazioarteko XVII. Jardunaldietan, bai Gernikan bai eta munduko beste tokitan ere Bakegintzaren esparruan eta dimentsio sinbolikotik egiten ari diren ekarpenak plazaratuko ditu. Gernika Gogoratuzen helburua Gernikako sinboloa aberastea da, Bakearen aldeko ekintzen eta hausnarketen bitartez gertukoa edo lokala denetik orokorra edo globala denera zabaldu asmoz. Gernika Gogoratuz sortu zeneko 20. Urteurrenaren eta Gernikako Bonbardaketaren 70. Urteurrenaren epemuga honetan oroitzapena eta Bakearen konpromisoa lotzen dituzten ardatz sinbolikoak indartu nahi ditugu. Oroitzea Bake sinboloak nabarmentzeko eta konpromisoa hartzea bestelako "Guernica"-k sortu eta eragiten dituzten biolentziak agerian jartzeko. Gogorapen historikotik abiatuko den lana izango da, eta Gernikako Bonbardaketaren lekuko izan diren gizon zein emakumeengandik haraindi joango dena, gertatutakoa berriro errepika ez dadin. Horretarako, lekuko guztiek Oroitzapen Kolektiboan biltzen diren bizipen eta kontakizunen bitartez aintzat hartuak izateko aukera izango dute. Bakearen aldeko konpromiso horrek komunikabideek Bakearen Kulturan duten berebiziko garrantziaz eta Bakearen eraikuntzan, eragile gisa, berriemaileek duten eginkizunaz ohartarazten digu. Bakearen aldeko konpromiso horretan salaketaren garrantziaz ohartzen gara, salaketa hori Artearen bitartez ere gauzatua izan daitekeelarik Bakearen Pedagogiaren baitan; adibidez, babesik gabeko biztanleria zibilaren kontrako indarkeria eta izugarrikeria agerian jarri zuen Picassoren "Guernica" gogoratzerakoan gertatzen den legez. Bakearen aldeko konpromiso horrek partaidetza demokratikoa sustatu nahi du, lokala denetik globalarekiko elkartasunetik eta globala denetik lokalarekiko aniztasunera joanez. Aniztasunaren sakontzea baita ezberdinen artean bizikidetasuna zabaltzeko ezinbestekoa den osagaia. Gernikako Kultura eta Bakearen Nazioarteko XVII. Jardunaldiotan landuko diren gaiak honakoak izango dira:

* Gernika, Bakearen Hiria, osagai sinbolikoak.
* Biktimak eta Oroitzapen Kolektiboa.
* "Guernica" artearen bitartezko salaketa. Artearen ekarpenak Bakegintzaren arloan.
* Hedabideen garrantzia Bakearen Kulturan. Bakearen berriemaileak.
* Bestelako Gernikak. Historia eta oraina. Bestelako gatazkak, gatazka ahaztuak.
* Partaidetza lokala eta Garapen globala Bakegintzaren arloan.